ШЕКАРАСЫЗ АРХЕОЛОГИЯ: ҚАЗАҚСТАН ҒАЛЫМДАРЫ ҚЫТАЙДАҒЫ ХАЛЫҚАРАЛЫҚ КОНФЕРЕНЦИЯҒА ҚАТЫСТЫ

2026 жылдың 20–30 қыркүйек аралығында Қытай Халық Республикасының Шыңжаң-Ұйғыр автономиялық ауданындағы Хами қаласында «Алтай–Тянь-Шань өңіріндегі археологиялық жаңалықтар» атты халықаралық ғылыми конференция өтті.
Қытайлық әріптестерінің шақыруымен конференция жұмысына Сарыарқа археологиялық институтының өкілі Эмма Радиковна Усманова қатысты.
Халықаралық конференцияға Қытай, Қазақстан, Ресей, Моңғолия және Жапониядан келген зерттеушілер қатысып, Орталық Азия мен оған іргелес өңірлердің археологиясы, көне тарихы және халықтар арасындағы мәдени байланыстардың өзекті мәселелерін талқылады.
Ғалымдардың басты назарында соңғы жылдардағы археологиялық жаңалықтар, Алтай мен Тянь-Шань аумағындағы ежелгі мәдениеттер, олардың даму ерекшеліктері, сондай-ақ көне қоғамдар арасындағы мәдени алмасу мен өзара ықпалдастық үдерістері болды.
Ғылыми пікірталастарда қазіргі мемлекеттік шекаралармен шектелмеген ежелгі мәдениеттер тақырыбына ерекше мән берілді. Археологиялық жәдігерлер қазіргі Қазақстан, Қытай, Ресей және Моңғолия аумақтарының ежелгі дәуірде өзара тығыз байланыстағы біртұтас мәдени-тарихи кеңістік болғанын көрсетеді.
Ғалымдар қола дәуіріндегі дала дәстүрлерін, ежелгі мәдениеттердің аймақтық ерекшеліктерін және түрлі аумақтар арасындағы кең ауқымды байланыстарды талқылады. Алтай өңірінің археологиялық кешендері, соның ішінде Пазырық мәдениетінің ескерткіштері ерекше қызығушылық тудырды. Олар ежелгі халықтардың шаруашылығын, өнерін, мәдениеті мен дүниетанымын тереңірек зерттеуге мүмкіндік береді.
Конференция аясында кәсіби кездесулер өткізіліп, алдағы ғылыми ынтымақтастықтың перспективалары талқыланды.
Сарыарқа археологиялық институтының атынан профессор Ван Цзяньсинге Институттың ғылыми еңбектері мен басылымдары табысталды. Профессор Ван Цзяньсинь — конференцияның негізгі бастамашылары мен ұйымдастырушыларының бірі, Орталық Азия археологиясы саласындағы белгілі маман.
Ғылыми басылымдарды табыстау Қазақстан мен Қытайдың археологиялық орталықтары арасындағы кәсіби байланысты нығайтып, ғылыми ақпарат алмасуды дамыту жолындағы тағы бір маңызды қадам болды.